ඉන්දීය සිනමා උළෙලට අමිතාබ් නැහැ - තවත් බොහෝ අය නොඑන ලකුණු

ජුනි මස 3 සිට 5 දක්වා කොළඹදී පැවැත්වීමට නියමිත ඉන්දියානු ජාත්‍යන්තර සිනමා උළෙලට එහි ප්‍රධානතම සංවිධායකුවන අමිතාබ් බච්චන් පවා සහභාගී නොවන බව වාර්තාවේ. අද උදෑසන ඉන්දියාවේ එන්ඩීටීවී නිවේදනය කලේ අමිතාබ් මෙම උළෙලට සහභාගී නොවන බවයි. සිය තීරණයට හේතුව ලෙස ඔහු කිසිවක් සදහන් නොකලත් පසුගියදා ඔහුගේ නිවස ඉදිරිපිට දෙමළ කණ්ඩායමක් පැවැත්වූ උද්ඝෝෂණ මෙම තීරණයට බොහෝ දුරට හේතුවන්නට ඇතැයි සැළකේ.

මේ අතර ඉන්දියාවේ ජනප්‍රියම නළු නිලි යුවලක්වන අභිෂේක් බච්චන් සහ ඓශ්වර්යා රායි ශ්‍රී ලංකාවට නොපැමිණෙන බව දැනටමත් දැනුම්දී තිබේ. කමල් හසන්, රජිනි කාන්ත්, විජේ, සූර්යා, අජිත් ඇතුළු දෙමළ නළු නිලියන් මෙම උළෙලට සහභාගී නොවනු ඇත.

මේ අතර ශ්‍රී ලංකාවේ පැවැත්වීමට නියමිතව තිබූ නළු නිලි ක්‍රිකට් කණ්ඩායමේ සිටි ෂාරුක් ඛාන් සහ අර්ජුන් රාම්පාල් සිය සංචාරයන් සිදු නොකිරීමට තීරණය කර තිබේ.

මෙම තත්වය හමුවේ ශ්‍රී ලංකාවේ පැවැත්වෙන ඉන්දියානු ජාත්‍යන්තර චිත්‍රපට උළෙල සාර්ථකවීම පිළිබද බරපතල ප්‍රශ්න පැන නැගී තිබේ. ශ්‍රී ලංකාව දෙමළ ජනතාවට එරෙහි අපරාධ කළ නිසා ලංකාවට නොයන්නැයි දෙමළ ජනතාවගේ උද්ඝෝෂණ පසුගිය කාලය පුරාම තමිල්නාඩුවේ පැවැත්විණි. ඉන්දීය නළු නිලියන්ගේ තීරණවලට මෙම උද්ඝෝෂණ බොහෝ සෙයින් බලපාන්නට ඇතැයි සිතිය හැක. කෙසේ වෙතත්, සංචාරක ව්‍යාපාරයේ ප්‍රවර්ධනය වෙනුවෙන් ආණ්ඩුව මෙම සිනමා උළෙල සංවිධානය කළද එම සිනමා උළෙල නිසා ලංකාවේ ප්‍රතිරූපයට විශාල හානියක් සිදුවන උද්ඝෝෂණ ඇති විය.